Kužina od verši prvanja 

Piše: Milan Rakovac

Cime potfrigane na peštu smo jur večerali, glavnja praska na ‘gnjištu, iskre ž nje lete kako cili ćapi zvizd zguorun h nebu, bura tanca balun z žlipci na kruovu urtajući se u kantu z ćukon ki će bolje hukati, pokuojni did mi Jure reče bratu mi i meni da ne dičina z žeravon se igrati, ki da bimo se popišali poda se, baba potle večere broštula u broštulinu miendule z cukron za nan dičini dati, i kruh na fete ubraća na trpijah, vino u bukaleti za supu se tepli poli oganj… 
                   E dopo Drio La ‘Rena, Mirela, amica de mia mare, ne preparava magnade che no te digo , cantando e no la me vol piu ben, e la me da el velen – capesante in tocio de malvasia, grongo in brodeto, granssipori in forno con sborion, sisole e pomodori – fio mio poesia in tecia…
                   Did bi nan povida štuoriju za jenega valje z Trošti ča mu je kuma štriga vidalice bila darovala pak da ki hi čuje uon mora pliesati ko će ko nieće, pak baba nan pokuojna Jana broji “magla, magla, maglina ča to tieče z Pazina, z črnima voli, z pikastima konji, da će te ponesti u črnu, črnu jamu”…
                 To je arkadija muojih ditinjskih spomini, pak u uvo modierno vrime pensan već boti: ma zašto nan živlienje ni drugo tako lipo kako ča je bilo? Zato ča smo ustarali i mi ča smo utroki bili u ta vrimena prvanja? Ma kako, digo mi, ter i svi ti muoji didi i babe, i Jure i Ive i Marija i Jana, pridid mi Grgo i pribaba Luca, pribarbe Tuome i Miho, su nan povidali štuorije, razminjali se mrež sobon, zakantali na tanko i na debelo, a najhuje mi je bilo kad bi did Jure zakanta jienu žalosnu: eeee la va la vaaa Ceciliaaa, la va dal caaapitan, la vedi el suooo marito sul albero inpicado…                     
                 Altroke festival, kad teta-Kata i zet njej Anđelo zakantaju pošla je Janka u šumu… Pak bi baba Jana valje se triesla ud smiha, kad bi did Jure povida kakoje “Sudac” pijan jašući na tovaru sprid jienin zidićon reka (sebi i tovaru) IŠ TUTOTE ĆU DRETO PASTI. Tovar skoči priko, “Sudac” boooffff na zemlju: A ČA SAN TI JA LIPO REKA (sebi i tovaru) i babi bi valje suze na oči bile došle, tako nan je ljudan, krstijanon, lipo bilo u vrimena pasana.
                 Pametin i kako se u našoj fameji, pur utročić ča san bija, dokle su mi did i utac bili živi, za svaki pašt držalo regul, nego ritualno. Kada bi mati zazvala utroke “ala na užinu!”, ruke svi uprati, okolo stolice svi posisti, i stariji i utroki, ma pomalo prez motačenja, ma didu lipo bi rekla mati “a ćete duojti, čako, užina je”, pak  did zadnji sisti mrež nas i pomoliti se, prikrižiti, mati to ča je bilo na stolicu vrći i mrež nas sisti, najstarijen zvaditi, na dičinu nikad maj ne zabiti, dica ne kumedijati, pak jisti u miru, to kakovu besidu reći, utroki mučati ko te ne pitaju, pak najzad posiditi i po jilu, se razminjati najveć za stvari gospodarske, ma i poškercati…
                 Da se valje kapimo: u Zagrebu san jur u gimnaziju hodija,  na čage u Glazbenjak, poli Tucmana, dokle je šiba rock’n’roll, po litu pak u “Plavoj laguni” dela za to ča šuoldi vadanjati, pliesi na teraci Lagune po cile noći, lipih samic valje z svita kraja… u čine se je hodilo - lipih filmi  najveć neorealističkih talijanskih  - “Kradljivci bicikla” eli “Gorka riža” eli “Nema mira medju maslinama” se nagledali, inajlipljih libri svita imali za štiti- Louis Adamich “Dinamit”, Jack London “Jerry sa otoka”, Isak Babelj “Crvena konjica”,.. pak i strip – Mandrak, Flash Gordon, Forza John – bin stija reći, mi drugi utroki ča smo došli u Grad, smo zajno diventali dica grajska, a ne da smo bili kako nazadni; ma svejieno, friških smokav  nabrati u suncestoku i pojisti hi u guštu,  gnjizda ubajti košića, ugle, šuojke, bačvarića,..  pak cimati loze, pak žeti i kositi i gruojze brati i vino načinjati i žito u malin sutlavriečki puoj samliti: pak uvečer se razminjati, pojisti dobrih fritul, zakantati, to nan Grad ni moga dati…
                   PAK U LITNJE DOBA U NEDILJU U BARABANU ZVONI  baderljanskih se zabrati na križini zad škrile spod ladonje pak z ljudan kušeljati i harte zugati, pak  ubajti parientu valje u Banki, Jakići, Badierni,.. eli uoni h tebi duojti,.. pak kokoš pripraviti na žgvacet z fuži i svi skupa lipo užinati povidajući jieni drugima ča je bilo ča je i ča bi moglo biti… 
                  Pak nazda na najliplje zimske ferije cile duge večeri se zbirati parienta i pretelji to poli jenih, to poli drugih, gospdarica to ča za večeru pripraviti, vržmo tarafulji pak pečene kunje, i jopet štuorije jeni drugin povidati i zakantati pisme starinske naše, pisme taljijanske, partizanske i svakakove…
                    Uvo ni propojo ča ja znan kakov uvod u libar ud kuhanja, ča?
                    A vero pak je! Najveć jušto zato ča  modierno živlienje potire stare navade socijalnega, skupnega  živlienja, i pišen uvi libar, anci – anke uvi libar, ki san napensa samo uvakove  libre pisati, koliko buden moga. 
                    Zašto to? Zato to, vero, ča se i z lap-topon sprid sebe, kako ja sad, i  z veturon i mobitelon i u gradskoj histeriji – svejeno moreš provati živiti liplje i bolje, i niedan nas u ten niebi frma, samo ko ćemo! Valja provati: svako malo, ma i nasrid Grada, ne nažginji televiziju, ne hodi u čine, ne tiči mobitel, ne ji  krmenadle-na- metre, zuovi pretele h sebi, pripravi njin ča domaćega dobrega i siromaškega za jisti, ne mieči CD na player, zaknataj šoto voče “pojmo mi mala na samanj”, ćeš viti da će ti to ki šekundivati, ćeš viti kako je lako bolje i liplje živiti: ZATO VEĆ UD SVEIGA DRUGEGA UVI LIBAR I PIŠEN! DA PROVAN POKAZATI ČOVIKU KAKO LIPLJE I BOLJE ŽIVITI: I ČA TO DOMAĆEGA UD STARINE, SIROMAŠNEGA MA RITAULNEGA I GUŠTOŽEGA VEĆ UD SVIEGA ČA JIŠ,  POJISTI – TO’Š PROŠTITI, ČOVIČE, NA  UVIH PADJIN MOJEGA LIBRA…          
               Lipi muoji ljudi, zajno ću van povidati da uvo ni libar meštrije gaštronomike. Uvo je libar spomina i starinske užance. Uvo je libar za štiti i se domisliti. Pak ki će, more provati pripraviti si to ča ud uvega mojega muoda,  jisti i živiti, koliko se more, po našu starinsku, jidući malo, smirno, u guštu, i forši već ud sviega drugega ča pametimo mi koji pametimo vrimena prvanja, jidući ča meritaš, anci, meritati svaki zalogaj u trudu dela čovičnega.
                Libar uvi će pokazati unen ki će to štiti i stiti viti, kako je šinjuorska bila siromaška naša kužina starinska! Pak moreš sad-na provati to ča pripraviti iz uvega libra, i iz suojih spomini ud unega ča bi ti baba pripravila - i to želin z uvin libron, da zavrti kola memorije i imaginacije, iz kojih ćeš lako sam se domisliti zabljenih gracij živlienja starinskega.
               U uven libru ćeš pur najti to kakov koristan naput kako to ča pripraviti ud dobrega jila. Zajno ćeš viti, muoj štilče, da u libru nie'š najti sve po riedu, i ne svaku fuozu jiliša. To san ja probira po memuoriji i pisa jieno za drugin kako me je pensir vodija... 
                Kužina  od verši, kužina prvanja, kužina domaća, kužina težačka, kužina starinska... Ma propjo socijalni motiv, kulturalni, ambijentalni, humanistički je u ten libru, u ideji libra. ČOVIČNA KUŽINA, TRADICIJSKA KUŽINA, RITUALNA KUŽINA. SIROMAŠKA ARISTOKRATSKA KUŽINA!
                Ne pensan je teoretizirati, ma literarizirati još jedan parat našega  živlienja, naše kulture istrijanske,  pak vrći u libar nike stare navade i muode, zdravije i liplje nego svi ta FAST FOOD,  anci JUNK FOOD, ča nan je nudi modierna civilizacija. Želin domisliti čovika kako se je jilo u prvanje vrime, i gledati ga naputiti kako je lako i za malo šuoldi dobro, guštuožo i goluožo jisti po našu starinsku.

SVI PAŠTI  IZ  VRIMENA PRVANJEGA

               Provaj, intanto, si posložiti jedan jedini dan u šetemani sve pašte po starinsku, vržmo uvako: 

               PRVI PAŠT: Kad se ustaneš, po težačku - prija sunca, pršnjak rakije popij. Pak usupaj kus starega kruha u kafe ud cikuorije domaće, ko ćeš, vrži i mlika. Popij ko te volja i sirovo jaje. Pak za delon.

               RUČIENJE (MARENDA):  FRITAJA Z ŠKALONJON: pofrigaš šaku-dvi škalonje narižene na kuščiće, na domaćen ulju, ma tik-tak, bašta da se umeka, zmišaš par jaji, koliko te komoda, posoliš, popapriš, zlicu mlika uliješ, zaliješ škalonju. Mene komoda jaja vrći u pršuru nprez hi zmišati, pak hi u pršuri na rahlo pomišati. Kruha. Temperanja, bevande, nu. Pak za delon.

               UŽINA (RUČAK):  JUHA UD OBLAKA -  na zlici-dvi domaćega ulja (anci, preže domaćega pešta) zažutiš zlicu-dvi muke, vrnjaču konšierve, zaliješ z malo vode; pak na drobno jenu lipahnu žbulju (kapulu), dva kumpira na kvadriće; dva mierlina (karote), pak neka se frigucka pe'čes minuti; doliješ vode koliko ti se vidi. Kad je kuhano, koliko rabi soli i papra, prežicu natacane prešemule, šakicu-dvi lazanj (tajadiel) domaćih. Oblakova juha je fanjska anke z šienon (orzo, far), ma šen  moraš vrći kad i sve drugo, anci, ga je bolje prija namočiti uru-dvi.

              MAKARUNIĆI POD ŠAKU, z GRLJKI IN BIANCO (najbolje su, meni,  pršutnice, lisičke, eli želdani, rumena blagva) -  narižeš šaku-dvi grljki, tik-tak hi pofrigaš na domaćen ulju, dva-tri minuta, još minut pofrigaš na ten natacan štruk čiesna i prežu prešemule, zaliješ z dvi-tri zlice bilice, posoliš, popapriš, prokuhaš dokle ključ ne učini, i zaliješ makaruniće. Sunčica i jieno jaje na salatu. Vina koliko rabi.Pak počinuti po ure. Pak za delon.

                UŽANCA (UŽINICA): Ko je ustalo ča makarunići, ko ne, PANADU načiniš tik-tak; dvi-tri fete starega kruha narižeš na kuščiće, posoliš, popapriš, zaliješ z zlicon-dvi ulja domaćega, po litra-litro vode, kuhaš minut-dva, naribaš po ten jeno malo sira domaćega. Mižolić vina. Pak za delon.

                 VEČERA: SALATA ŠTANJA; kumpiri kuhani u kori, ulupljeni, zrizani na fete. Zajno na teplo šaku-dvi rokule diblje, zabiliti z črčkići brzo zafriganih bile slanine, soli, papra, octa. Kruha.

                 SUPA Z KUNJON: supa kako svaka supa, ma ne uva. Kunju spiečeš pod čripnjon (u kruhu, eli samu u fornu, eli na manje kuse pak u poklopljenoj pršuri). Pak zapečenu kunju vržeš u supu,  mrež dva prsta razmrvljene suhe slavuje, malo špuorkega cukra, malo papra, malo ulja domaćega - pak neka pur počiva. Jiš i piješ; i supaš pripečeni kruh, kako u svakoj supi…
                 Pak se razminjati za štuorije i parientu i ljude i smiha da bude i pisme.Pak spati... Tako se je jilo u prvanje vrime;  altroke slow-food, altroke makrobiotika, altroke gušti!!!
*Moje selo se zove RAHOVCI, prezime je RAHOVAC, a naši poslije 1945 uzeli su ga iz talijanskog oblika (prije fašizma) RACHOVAZ…
                             
                             ČRIPNJA SVIH MIRAKULI SIROMAŠKIH
         
                 Uvi libar intiedin kako niki putopis po suojoj memoriji, kako ča san jur reka, ma če je to putopis po memuoriji - to je puoj nazda poli 'gnjište i na škanj sisti, putovati po pijati i škudiel, po luonci i bronzini, po bukaliet i baril, po prvin čerišnjan ča hi gucaš cile, po prvin petruovkan  ča te čine valje zakantati ud miline “pojmo mi mala na samanj”, pak gran’finale kad uvečer u svitlu “ćore” - petrolijo i stinj u kakovoj bočici ud medežije; svitlost muoja ditinjska, kad sana štija “JERRY SA OTOKA”, Jack London - spod čripnje kad je z muletami dvigneš, se svitle zlatni kumpiri potni i svire ka’i  vidalice, a zrna soli se lište kako i dijamanti…
                 Intanto, u libru ćeš najti i to koju štuorijicu ud jila i pila, i to ča drugega, tako da sve skupa uvo ima biti kako nika LIBERA FORMA LITERARNA. Uvo ni propjo kuharski libar, nu,  ter ja nis kuhar, kako ča san jur reka, i muoja je ideja provati zapisati to ča ud unega ča je domaće, težačko, ribarsko, siromaško, ča još pametimo da smo kako dica jili, a ča je zgojilo generacije i generacije naših starih. Ma i još to ča tega ča san prova po svitu klateći, mašimo poli prvih susedi, ča jidu podobno kako i mi drugi, i ča smo tako i tako ud njih uzeli dosti tega za našu kužinu, kako i oni ud nas.
                 Drugo ča mi je na pameti, je to da provan pokazati, kako u uvih dobi punih morbina i bisa, kada smo svi štufi sviega, pak tako ni jilo ni pilo nas ne moru kuntentati, da pur se more to ča za se načiniti. Čovik ni nikad kuntenat, ni tega čovika ča ne skoca da joh kako nan je bilo lipo u prvanja doba. E ben. Niedan nan ne zapačiva da provamo si živilienje regulati po starinsku. Slow food?  Slow life nan se će, živlienje pomalo i pacijentano! Uva fibrozna priša ča nas goni naprid sve brže i brže i brže, to nas pešta i muči. Čoviku rabi počinka, čoviku rabi se pofrmati, popensati, ne galopati zajno kako furija. Čoviku se će na miru živiti.
                  Ter samo te bejate šparuge, kada kako mlado brečienje se razletimo po graž i boškan da bimo nabrali mac, ča nan da već gušti živlienja nego sve ča vidimo na televiziji, samo to nas puti kako u sviemu moramo najti suoju harmoniju, pak tako i u jilu.
            Skud pak ja u uven puoslu kuoga , će se štupiti ki me pozna. Uvako, muoja kulinarska inicijacija  je bila anke muoja infantilna fascinacija; jiena ud prvih lipih slik muojega utroštva je zimska večer, baba ča nan doniese klasunac cikvantine, pak je lipo runimo zrno po zrno, glavnje praskaju na ‘gnjištu, pak baba zrnje naspe u broštulin, kaplju ulja domaćega, prežicu soli, pak na ogenj š njin, pak kada je to počelo puškati kako mitralje tudeške i repubblichinske kad su u našen Zablogu pobili jedanajst naših mladići na spanju,.. pak kad je baba doprla dimieći broštulin a iz njega prosula nan u pijadinu cilo bogastvo GROŠI (kokice, ča bi rekli Gorinjci, popcorn) rascvitalih, žutih i bilih i punih najlipljih profumi, pa ala mi dičesina zobati hi pune šake, pak did zakanta "Vrbniče nad moren" "La va, la va Cecilia" i sviri na organić, a glavnje praskaju na 'gnjištu, a bura trnka z žlipci, a ćora hita sfumature po kuntientih lic fameje - voila la chose, bi reka pokuojni Fučić...
                Druga štuorija za kapiti ča će na bot ta Rahovac i u kužinu se pačati; kad bi baba sir delala, nasupati kruha u još tepli ŽUR (sirutka, surutka) zelenkast ma pun bilih mrvic sira, to su bili svi gušti svita, a ma kulmen sviega kad bi ti ud jur umišenega sira črpla ŽAMAK i ti ga dala puna smiha i liposti duše, si se poćutija kako kralj svita, inšoma. Eli kad bi iz čistega bilega platna zvadila prid nas piena učinjenu SKUTU…
                Iz tih naših rituali ditinjskih  pametin i kako bi DIVENICE pripravljala, kako bi nan dala usušeno gruojze pod gredami metati u nje zrno po zrno. I još tega iz čiste fascinacije (pune pedagogije, se kapi), kako ča bi zafrigala nadiv za KOBASICE pak ala pokusiti svi čisti, i svaki povidati da ko fali tantin sdoli, ko papra, ko čiesna... 
                Pametin i jedan tabu: kad bi se prahca ubilo, vajk bi se samo didu popeklo mozak u čistoj harti u teplen lugu. Da mozak ni za dicu, da ne nan udre na moždane, i komoč san čeka uriesti i pokusiti ta bejati mozak, kako ča i san.
                I pametin najliplje pašte muojega živlienja, u intradi. Vržmo, cimamo u brajad, čvrljuga vrhu vrhi nebeskih kanta najliplji kanat svita, baba duojde z buricon punon njoki, zamotanon u čisti tavajo na crlene i bile kvadre, "ala jisti težaki muoji, ter ste meritali ča ste puosla načinili, i vi utročići, lipe rukice babine". Tavajo na travu, u hlad spod smokve, mi okolo burice, samo ča me još sad  sran kako san, jur skabljen ud Grada, se mrska jisti z drugin, pak bi mi baba udvrgla na pokrovac...
               Ma uno ča pametin da me je natentalo prisieći samen sebi da ću ben ja jedan bot samen sebi kuhati, to je bilo uni bot kad si je stari ‘dovac barba-Tuoni “Palijaga” u buričici forši ud litra kuha njokiće, niki brižni šugo ud suhih rebri je pronta, i kuha uon te njokičiće, i gledan ja to, gledan, pak mu rečen:
                    - Barba-Tuoni, a ma su mi duobri takovi njoki! 
                    - Ma uvi ti ne budu! - mi je udriza neto i šćeto i dreto u nuos , prez riguarda. Ala hudobina stara, pensan ja sam sobon, a ča san moga imati četiri-piet lit, ĆU SI BEN JA JEDAN DAN SKUHATI BOLJE PLJUKANCE UD TUOJIH!
              Ta dan je doša čuda brže nego ča san pensa, mati je morala delati u fabriki, mi dica u škuolu, pak bi nan rastakala tisto i narizala tajadele, zakuhala šugo, i me naputila kako da sve to finin kad douojden doma z škuole; malo soli i konšierve u šugo, malo prešemule, zaliti z malo vode, ma malo, pokusiti svako malo ko ča fali, na malen ognju kuhati ga po ure. Veliki lonac pun vode,  pak piena kad zakuha vrći dobrahnu zlicu soli (ne prija, prez soli prija zakuha), pak tisto lipo pomalon kako popiezati mrež prsti i ga rastriesti da se ne takiva, pak pomalon ga u lonac metati, pak kad tisto počne plivati za zguorun uvrh luonca, i popini, je pruonto, ucidi tisto na cidarin, nazda u lonac, šugo priko tega, sira naribaj ma šakicu, ne već, zmišaj… 
              Sve skupa, jur prija mature ja san bija kogo i po, svaku stvar san zna skuhati na ten svitu -  i juhe i tista i šuge i pečienja i zelienja i salate i fritaje i friture i sve ča ćeš na ten svitu, finta “francuski krumpir”, ča ga još pametin; skuhani kumpir u kori uguliš i razrižeš na fete, pak jedan ried kupmira posložiš, tantinić soli i papra, pak filu safalade eli špekvuršta (da imaš domaće kobasice još bolje) pak trdo kuhana jaje na fete, pak jopet kumpir itditd, pak kiselega vrhnja priko sviega, i ala u forno po ure - manjada i po! Cio e, ča bi reka niki naš iz Bratovići ča ga je to za jienu stvar kristijansako živlienje denjo čovika: - MAKARUNI KA’I PASTUOLI, VINA KA’I ZIEČJA KRV, PIJ I JI,  I VALJE ĆA!